Sabungero, Ginawan ng Lapida ang Manok na Nasawi sa Laban!

                                          Kapag natatalo ka sa sabong, ano ang iyong nararamdaman. ‘Di ba’t nalulungkot ka at nanghihina...

                           

              Kapag natatalo ka sa sabong, ano ang iyong nararamdaman. ‘Di ba’t nalulungkot ka at nanghihinayang? Hindi lang dahil sa natalo ka sa pusta kundi dahil namatayan ka ng alagang manok. Pinalaki mo kasi ito, inaalagaan nang husto at ikinundisyon. Ginawa mo ang lahat para maging matibay ang manok mo, hindi lang sa sakit kundi sa laban. Pero ganyan lang talaga ang sabong, may nagwawagi at may nasasawi.

                Umani ng maraming likes at comments ang post ni George Trance Otayde sa isang Facebook group na Kapcm (Knowledge in Accurrate and Precise Conditioning Method). Nagbigay kasi siya ng tribute sa kanyang warrior na White Kelso na nasawi sa laban. Apat na beses na raw niya itong inilaban at lagi itong walang sugat. Pero sa huli ay ibinigay nito ang lahat ng kanyang makakaya na kahit putul-putol na ang bituka ay tila wala pa ring daw ipinagkaiba ang kilos at lakas. Nagawa pa ring manalo ng manok na ito.

                Nagpapasalamat si Otayde sa kanyang White Kelso pati na rin sa mga kasamahan nitong warrior dahil may pambili na siya ng patuka. Hindi lang siya basta nagpapasalamat dahil nilagyan pa niya ng lapida ang manok nang kanyang ilibing na ang nakasulat ay Warrior/White Kelso.

                Marami namang mga sabungero ang naantig o sumaludo kay Otayde dahil ang iba kapag namamatayan ng panlaban ay balewala lang sa kanila. Puro sabong lang daw kasi ang iniisip. Sabi pa ng iba, sana ganito rin ang ibang sabungero para mas lalo silang suwertehin. Nagpaabot pa ng pakikiramay ang ilan sa mga nagbigay ng komento sa post ni Otayde.